حوار مع مسطول

في ظل الاوضاع الحاليه,ومجاراة لعصور القنوات الفضائية

كان لنا الحوار التالي مع احد المساطيل من احدي الغرز _غير الغرزة بتاعتنا _على ناصية الشارع



بدأنا الأسئلة

وكان اول سؤال للمحاور:

بصفتك واحد من المواطنين المحبين والمضحين من أجل هذا البلد

كيف تري مستقبله؟


المسطول:أكيد هيكون لوز وآخر بهججة

والناس هتكون فوووووووووووووووق وطايرة وآخر سعادة



المحاور: في رأيك ما هي أفضل الأساليب والطرق اللازمة لحل كل المشاكل التالية؟


1- البطالة


المسطول: إحناا نموت الشباب الجديد الصاعد اللي عاوز يشتغل من دلوقت,

قبل ما يموت هو من الحسرة..أو يفكر انه يفجر نفسه

وبكده يكون عندنا وظائف خالية للجيل اللي بعديه ..



2-تلوث المياه


المسطول:دي بقى حلها سهل جدا..الميه المعدنيه موجودة ومتوفرة في كل مكان وباي كميه

ولا احنا بقي غاويين صنع مشاكل وخلاص؟

وأنا لي رأي ممكن يحل الموضوع ده ..

إن يتصرف لكل مواطن إزازه ميه معدنيه نظيفه علي التموين

وأظن ان دا حل كويس يرضي جميع الاطراف ..



3-رغيف العيش


المسطول: أعتقد ان لغايه النهارده وحتي هذه اللحظه إنه في متناول يد الجميع

وسعره مدعم لكل الناس..ويعني هو لو كان شاحح شويه في البلد

فالبديل موجود..البسكوت حلو وجميل وفي منه كمان بالشيكولاته

وموجود في كل مكان ..العيب في الناس اللي مش عايزة تفكر في حلول لمشاكلها.



4-التعليم


المسطول: دي بقي أهم حاجه لازم نعالجها بجد..

لان التعليم هو اللي بيربي الناشئين للمستقبل وبيصنع الاجيال

بس أهم حاجه لازم نعلمها لولادنا ..امشي جنب الحيط

وخليك في حالك احسن لك..وإن شفت الغلط غمض عنيك وماتتكلمش..



5-ارتفاع الاسعار


المسطول:

ممكن نحلها بخفض الاجور لكل فئات الشعب
وهنا الناس مش هاتعرف تشتري حاجه و التجار مش هايبيعوا

وتحصل حاله كساد اكتر.. هيضطر التجار يخفضوا ثمن السلع بأقل من تمنها الحقيقي

وتبقى كل حاجه ببلاش ..(سيدي يا سيدي)


وأخيرا .. في ناس عماله تتكلم و تقول إن كل حاجه دلوقتي بتغلى وبيرتفع سعرها

ماعدا الانسان بس هوا اللي بيرخص ..إيه رد حضرتك؟




المسطول:

آه ..لما الناس تفوق بجد وترفض تتعامل على انها حيوانات

وعلى الأقل يتعاملوا بينهم وبين بعضيهم على انهم بني آدمين

وكل واحد يعرف حقوقه وواجباته و....



المحاور
بس..بس..ستوب..انت بتقول ايه؟

انت جاي تفوق دلوقت...فاصل ونعود مع مسطول آخر من غرزة تانيه في حته تانيه

تحيا التوهاااان

سلام مربع لكل مسطول

بااايووو

أنا على أتم الاستعداد أكون من المساطيل لو دا

الحل الوحيد لمشاكلنا...بس الخوف ننسطل ولما نفوق

نلقى الدنيا خربت وسحبو منا الجنسيه

ويطلعوا لنا شهاده وفاه واحنا على قيد الحياه...

ليسَ للقومِ حديثٌ غير شكوى مستمرَّهْ

قد تساوى عندهُمْ لليأسِ نفعٌ ومضرَّهْ

لا تَسَلْ ماذا عراهُمْ كلُّهم يجهل ُ أمرَهْ

حائرٌ كالطائرِ الخائفِ قد ضَيَّعَ وكرَهْ

على فكرة يا هدى
أكتر حاجة بتعجبني في تعليقاتك هي إنك
عندك لكل موضوع أبيات من الشعر


وعلى فكرة إنتي لسه لحد دلوقتي لم تردي على سؤالي
بما إنك تحفظين الكثير من أبيات الشعر ..... فهل إنتي بتكتبي شعر ؟ ولا بتحفظي شعر للشعراء فقط

أخى الفاضل مستر حازم

عندما طرحت احدى العضوات عن الشعر وقالت

ماذا لو اعتزل الشعراء الشعر ؟؟
قلت أن من المستحيل شاعر يعتزل الشعر لان الشعر هذا موهبه فضلها الله لأناس عن غبرهم لا يستطيع فرد كتابه شعر بمجرد أنه يريد كتابه الشعر ...والا لوجدت كل الناس شعراء ...
فهناك أناس تتزوق الشعر وهناك أناس تحب قراءته فقط ...

وأنا أحب قراءه الشعر وأتذوقه وأتمعن فى معانيه ...
ولكن لم يخطر فى بالى كتابته ولكنى أحفظ الكثير منه

تصدقنى عندما أقول لك أننى لم أجد الوقت للجلوس حتى فتره كبيره على الكمبيوتر
فأنا أقوم بكل واجباتى المنزليه وأنا أفتح الكمبيوتر يعنى أرد على المواضيع فى لحظات وأعاود لعملى وأولادى حتى لا أقصر فى شىء
من واجباتى المنزليه أحاول استثمار وقتى فى الشيء المفيد ..واشغل رأسى أخاف أن أهملها فأفقد الكثير ...
والحمد لله أحاول أن أكون عادله فى حق أسرتى ونفسى وربى

بارك الله فيكي يا أخت هدى
وربنا يباركلك في أولادك
وشكرا على الرد