بمناسبة انتخابات مجلس الشعب والأجواء الديموقراطيه التى ننعم بها فى بلدنا الغالى مصر أقدم لكم هذه القصيده الشعريه للشاعر الشاب /هشام الجخ وهى من أفضل ماقرأت له وتتماشى مع ما يشعر به كل مواطن شريف مطحون فى بلدنا واتمنى أن تنال اعجابكم جميعا......
جحا .... شعور سخيف!!!
شعور سخيف ..... إنك تحس بأن وطنك شىء ضعيف
صوتك..... ضعيف رأيك...... ضعيف
إنك تبيع قلبك وجسمك وإنك تبيع قلمك وإسمك ..... مايجيبوش حق الرغيف
سألوا جحا عن سر ضحكه قاللك أصل اتنين وشبكوا
اللى كان من تحت ميت واللى كان من فوق كفيف
ده شعور ....... سخييييييييييف!!!
وشعور سخيف ...... إنك تكون رمز الشحاته !
تبنى مبنى للشحاته تعمل وزاره للشحاته
يا ساقيه دورى عدى فوقى ودوسى
نصبوا عليا وشحتونى فلوسى
ربطونى فيكى ...... حتى ماتغميت
هما اللى فرحوا ووحدى أنا .............أتغميت.
أنا اللى صاحب البيت عايش بدون لازمه!!
ولما مره شكيت إدونى بالجزمة !!!!
مش لاقى تطفح يا ديك.... هاتولنا وجيبولنا وادونا !! هنجيب منين نديك؟؟؟؟
مش لاقى تطفح يا ديك ..... طافح يا بلدى غدايا ولوعتى غدايا ..
وآدى الأحبه التقوا وإتجمعوا عدايا.
أنا اللى زارعك دهب ...... بتأكلينى سباخ!!
ماإن كان ده تقل ودلع بزياده دلعك باخ.
لا شوفت فيكى هنا ولا شوفت فيكى ترف ..... كل اللى فيكى قرف!!
كرامتنا متهانه واللقمه بإهانه
بتخلفينا ليه لما إنتى كارهانا؟؟؟؟؟
يعنى ايه تبقى إنتى هبة النيل يا بوبه وكل يوم الميه تقطع؟؟!!
يعنى ايه لما اشتكى غلو الفاتوره يقولوا تشكى ..... بس تدفع؟؟!!
لما قش الرز ثروه بتتحرق واما نفط الأمه ثروه بتتسرق...
واما جلادك على ولادك بيبطش واما علمك مايلاقيش ياكل.... فيطفش...
يعنى ايه نرفع ايدينا بالسلام لاجل الغزاه؟؟
ويعنى ايه لما ابقى ماشى فى حالى ...... أتشد اشتباه؟؟؟
يعنى ايه لما اتحبس أربع سنين حبس احتياطى ؟؟..... حبس اعتباطى!!!!!
يعنى ايه مش حاسه بالعمر وغلاوته!
بتصبى مر العمر ليه ؟؟...... دأنا كنت هأوهبلك حلاوته !!
أنا عمرى ماتأمرت ولا حطيت شروطى .... ومكان ماترسى مركبك بابنى شطوطى
أنا كنت جيشك.... لما مماليكك باعوكى
وكنت يوسف ..... لما عيشتى سنين عجاف
وضلوعى دى اللى فى معركة قادش حموكى
وشفايفى دى اللى مابطليتش فى يوم هتاف
أنا كل شبر فى أرضك اتمرمغت فيه
وكل يوم عيشتيه أنا اتعذبت بيه
بتكرهينى عيونك السودا وأيامى اللى فاتت..
مانتيش حبيبتى من النهارده ..... حبيبتى ماتت .......
مع صوت أدانك جرس فى الشده صاحيينلك
من أمتى كانوا الحرس هما اللى باقيينلك؟؟؟؟
بيعتينى علشانهم وعينيكى معصوبه
يا هل ترى خاينه وللا زيى مغصوبه؟؟
كل الكلام اتقال والشعر بقى ماسخ
والصبر علو جبال والظلم شىء............. راسخ..
وطن وغارقان فى النطاعه كل شىء ريحته نطاعه
علمونا بالعصايه ورضعونا الخوف رضاعه
علمونا فى المدارس يعنى ايه كلمة قيام...
....... قيام.......
علمونا نخاف من الناظر فيتمنع الكلام
علمونا ازاى نخاف وازاى نكش
بس نسيوا يعلمونا الاحترام.....
فماتزعلوش لما ابقى مش باسمع كلامكم
وماتزعلوش ........... ((لما أخرج عن نظامكم))
مستنى ايه من طفل ربوه بالزعاق غير المشاكل والخناق..
كل اللى بيقوللك بحبك ...... دول نفاق...
أنا لما قلتللك بحبك ......... كان نفاق...
الحب يعنى اتنين بيدوا
مش ايد بتبنى وستمية تيت تيت....... يهدوا.
الحب حاله الحب مش شعر وقواله.
الحب يعنى براح فى قلب العاشقين للمعشوقين.
يعنى الغلابه يناموا فى الليل...... دافيانين.
الحب يعنى جواب لكل المسجونين هما ليه بقوا مسجونين ؟؟؟
يعنى أعيش علشان هدف علشان رساله
يعنى أحس بقيمتى فيكى إنى مش عايش عواله
يعنى لما أعرق......... تكافئينى بعداله
الحب حاله الحب مش شعر وقواله.
الحب حاجه ماتتوجدش فى وسط ناس .............. بتجيب غداها من صناديق الزباله..
الحب جواكى ................. استحاله ..........
الأحد يناير 02, 2011 11:51 pm
