إعلان ينرفز

مفيش حاجة واجعه قلبى ومسببالى انتفاخات زى الاعلان الغريب اللى بيطاردنى فى شوارع المحروسة بالاضافة للتلفزيون واللى شعارة




تحسبها صح .... تعيشها صح ..




مستفزززززز جدا ....




واحد بيوفر في استهلاك المياه (إللي هي المَيّه يعني!) وهو ده إللي خلاّه يدَخّل ابنه أحسن مدارس!!!!


يا سلااااااام!! طب إيه العلاقه؟؟؟!! ....





وواحد تاني بيوفر فى استهلاك الكهرباء واللقطة اللى بعدها المحروس بيجرى ورا عياله فى الشاليه بتاعه فى بورتو السخنة !!!





وبعدين رمش العين وفرت من مصروفها وجابت لاب توب !!! مصروف إيه فى ليلتكم الزرقا على دماغكم إللى بيجيب لاب توب ده؟!!!



وطبعا فى الاخر الجملة الاكثر استفزاززززززززز فى المجرة الارضية متعديش حتى على الهنود




( على فكرة احلى تحية للهنود بتوع النووى )



..... احسبها صح ... تعيشها صح ....

وعليه...... خدوا عندكم بقا.... هِيّا جت عليّا انا يعنى ؟؟؟!! ...




توتى وفر فى فلوس المخدرات بتاعته وجاب عربية هامر جديده !!

تحسبها صح .... تعيشها صح



نوسة وفرت من فلوس الديسكو وسافرت 3 شهور فرنسا الصيف اللى فات وفى الغالب مش راجعه !!
تحسبها صح .... تعيشها صح



سهير بتشرب علبة سجاير واحدة بس بدل اتنين وبفلوسها حجزت شهر فى الفورسيييييزووون فى الرويال سويت!
تحسبها صح .... تعيشها صح



حنكش قلِّب باقية فلوس العيش اللى مامته كانت بتديهالو وبيهم دفع مصاريف الجامعة الامريكية !!



تحسبها صح .... تعيشها صح


عم حسين بواب العمارة وفر من التيبس اللى بياخدوا من السكان واشترى رونالدينهو بتاع البرازيل !!
تحسبها صح .... تعيشها صح


عادل صاحب شركة استيراد خصم من كل الموظفين 10 ايام وبيهم جاب خاتم سوليتير للفيونكه بتاعته !!
تحسبها صح .... تعيشها صح


صبحى وفر فى أكل الجبنة الروووومى وجاب فيلا فى التجمع الخامس بالبسين وجاب عوامة وزة كمان !!
تحسبها صح .... تعيشها صح


طأطأ بطل يجيب الكارت ابو 25 جنية وبيجيب الكارت ابو 10 جنية وبالفرق دفع المهر والشبكة وعمل فرحه فى لندن وبيقضى شهر العسل فى الكاريبى !!
تحسبها صح .... تعيشها صح



نداء الى اصحاب القلوب الرحيمة وجمعيات الرفق بالانسان والحيوان.... اوقفوا الاعلان ده



أو وفرولنا أدوية مكافحة الحمووووووضة

بجد أصبح شىء مبالغ فيه الاعلانات

فكرين الناس لسه مش بتفهم أنا بعتبره من وجهه نظرى المتواضعه

أنه غباء من صاحب السلعه المعلن عنها وفلوس وراحت فى الفاضى

الناس أصبحت عندهم ادراك ووعى بكل شىء

ثم يقى شىء سخيف لما تجلس تتفرج على برنامج أو أى شىء فى t.v

وكل 3ثوانى اعلان مش بتحمل على طول بقفل وأظن الكثيرين يفعلون نفس الشىء

أصحاب السلع دي بيفكروا إنهم أما يكرروا إعلاناتهم على التليفزيون ويكتروها
إن الناس هتشتريها وبالتالي تزيد مبيعاتهم

ولكن المشاهدين أصلا أذكى من المعلنين أنفسهم بيسمعوا الإعلانات وبيشاهدوها عشرات المرات يوميا .......... ولكن بيشتروا أي منتج تاني بيستخدموه من زمان
وبيضحكو على المعلنين

وبلدنا كلها ماشية كده

كله بيضحك على كله